admin
ብዓውታ ዝተፈነወ— ነቲ ዝኸበደ ሕቶ ግን ከይመለሰ ዝሰገረ መልእኽቲ ሓድሽ ዓመት 2026
ርእሰ ዓንቀጽ ኣንፈት – 2 ጥሪ 2026
መልእኽቲ ሓድሽ ዓመት 2026 ኣምባሳደር ዓንደብርሃን ወልደጊዮርጊስ ብናይ ሓደ ምኩር መንግስታዊ ቃና ርእሰ ተኣማንነት እዩ ተፈንዩ። ንኡድ፡ ሃገራውን በቲ ልሙድ ቃላት ዲሞክራስያዊ ሕዳሰን- ማለት ልዕልና ሕጊ፡ ቅዋማዊ ምሕደራ፡ ምሕያል መንእሰያትን ህንጸት መንግስትን ዝተኸስተውን እዩ ነይሩ። ኣብ ዲያስፖራ ዝርከቡ ኤርትራውያን፡ ብዓሰርተታት ዓመታት ዝጸንሐ ጭቆና ዝደኸሙን ናብ ሓርነት ዝወስድ መንገዲ ሃረር ዝብሉን፡ ቃላቱ ምስ ነዊሕ ዝሓልምዎ መጻኢ ይሳነ’ዩ። ምሉእ መልእኽቱ ኣብ መርበብ ሓበሬታ Eri-Platform’s website ክትረኽብዎ ትኽእሉ ኢኹም። እቲ መልእኽቲ እናተዘርግሐ ምስ ከደ ግን ዝያዳ ተኣፋፊ ሕቶ እውን እናልዓለ እዩ። ንሱ ድማ ብድሕሪ እዚ መደረ’ዚ እንታይ ፖለቲካዊ መድረኽን፣ መንከ ናብ ተግባር ክትርጉመን ተዳልዩ’ሎ? ዝብል ሕቶ ምምላስ’ዩ።
ፍትሓዊ ንምዃን ወይ ግደ ሓቂ ንምዝራብ፡ ኣምባሳደር ዓንደብርሃን ስቕ ኢሉ ተዓዛቢ ፖለቲካዊ መድረኽ ኤርትራ ኮይኑ ኣይፈልጥን። ሃገራዊ ባይቶ ኤርትራ ንዲሞክራስያዊ ለውጢ ኣብ ኣዲስ ኣበባ ንኻልኣይ ዋዕላ ኣብ ዝዳለወሉን ኣዝዩ ኣገዳሲ ምንቅስቓስ ኣብ ዘድልየሉን ዝነበረ እዋን፡ ዋላ እቲ ዝወሰዶ ስጉምቲ ናብቲ ዝድለ ሓድነታዊ ጥምረት እንተዘይበጽሐ፡ ኣምባሳደር ዓንደብርሃን ግን ተበግሶ ወሲዱ ኣብ ናይሮቢ ሓደ ዓቢ ናይ ዘተ መድረኽ ከፊቱ ነይሩ’ዩ። ኣብ ዝነበረሉ እዋን፡ ተበግሶ ብተወሳኺ ኣብ ጀርመንን ካልኦት ሃገራት ኤውሮጳን ብርክት ዝበሉ ፖለቲካዊ ተዋሳእትን ናይ ናይ ሲቪክ ጉጅለታትን ጸዊዑ ብዛዕባ ፖለቲካዊ ቅልውላው ኤርትራ ዘተ ክኸፍቱ ፈቲኑ። ንዓመታት ኣብ ፖለቲካዊ ዲስኩር ዲያስፖራ ፍሉጥ ድምጺ ኮይኑ ጸኒሑ፡ ንጹርን ውሁድን ትንታነታትን ሓተታታትን ኣበርኪቱ። እዚ ጻዕርታት እዚ ኣገዳሲን ኣፍልጦ ክረክብ ዝግብኦ ጸዓታት እዩ።
ይኹን’ምበር፡ ሎሚ ንኤርትራውያን ገጢምዎ ዘሎ ፖለቲካዊ ክውንነት፡ ሓሳብ ይኹን ሃገራውነት ዘረባ ኣይጐደሎን። እቲ ሓቀኛ ጸገም፡ ባህግታት ናብ ዝተዋደደ ፖለቲካዊ ስጉምቲ ክትርጉም ዝኽእል ውሁድን ተኣማንን ውደባዊ ቅርጺ ዘይምህላዉ እዩ። ኣብዚ ወሳኒ ነጥቢ እዚ መልእኽቲ ኣምባሳደር ዓንደብርሃን ምሉእ ብምሉእ ብስቕታ ዝሰገረ ነበረ። እቲ መደረ ካብ ሃገራዊ መድረኽ ዝፍልፍል ኮይኑ ክድመጽ እንከሎ፡ ደራሲኡ ግን ብኣድማዒ መንገዲ ካብ ዝኾነ ይኹን ውሁድ ተቓዋሚ ኣካል ገሊሉ ደው ዝበለ እዩ። ንድምጹ ፖለቲካዊ ክብደት ንምልቃሕ ዝኾነ ይኹን ትካላዊ ደገፍ ዘይብሉ ክነሱ ግን ኣቐዲሙ በዓል መዚ ናይ ዝተወደበን ሓባራዊ ምርቓ ዘለዎን ኮይኑ’ዩ ተዛሪቡ። ሕመረት ናይቲ መልእኽቲ ከኣ፡ ኣብ መንጎ ቃና መሪሕነትን መሪሕነት ዘይተዓደለ መድረኽን ዘሎ ጸገም’ዩ።
እቲ መደረ፡ ኤርትራውያን ዝደልይዎ ኩሉ፡ ፍትሒ፡ ተሓታትነት፡ ዲሞክራስያዊ ምስግጋር፡ ቁጠባዊ ምሕዋይ፡ ትካላዊ ጽገና ኣስፊሩ፡ ንዕጫ ናይዚ ምዕራፍ ዝውስን ሓንቲ ወሳኒት ሕቶ ግን ክትምልስ ኣይከኣለትን። ንሳ ድማ ናይ ስሙር ፖለቲካዊ ጥምረት ኣውቶቡስ እንተዘይሃልያ፣ እዞም ባህግታት ኣብ ዓውዲ ቃላት ተንጠልጢሎም እዮም ዝተርፉ። የነቓቕሑ እምበር ኣይዋስኡን-ነቲ መዕለቢ ቦታ ይገልጹ ግን ነቲ መንገዲ ሸለል ይብሉዎ። ኣብ ዝተበታተነን ዝደኸመን ዝጋጮን ዲያስፖራ መልክዓ ምድሪ፡ እዚ ምግዳፍ ንእሽቶ ናይ መስትያት ጸገም ዘይኮነስ፣ ቀንዲ ናይምንጪ ናይቲ ጸገም እዩ።
እዚ ድማ ንኣምባሳደር ጥራይ ዝምልከት ጸገም ኣይኮነን። ንኽልተ ዓሰርተታት ዓመታት ንተቓወምቲ ዲያስፖራ ዘዳኸመ ቅዲ እዩ። ውልቃዊ ተበግሶታት: ምሩጽ ኣኼባታት: ውልቃዊ ዓንኬላት: ከምኡ’ውን ኣፍራዪነት ዘይብሉ ክትዕን፡ ትካላት ዘይብሉ ምንቅስቓስን ዘፍሪ ዝተፈላለየ ጻዕርታት ናይ ኩሉ ተቓውሞ ዝውክል ተርእዩ እዩ። መደረ ኣምባሳደር ኮነ ኢሉ ይኹን ብዘይፍላጥ ነዚ ቅዲ’ዚ ዝደግሞ ዘሎ ይመስል። መሓውር ዘይብሉ ራእይ፣ ተወፋይነት ዘይብሉ ሓተታ፣ መሪሕነት ማዕቀፍ ዘይብሉ ቋንቋ መሪሕነት’ዩ ቀሪቡ ዘሎ። ሎሚ ኣብ ኤርትራ ዘሎ ፖለቲካዊ ቅልውላው ናይ ምናኔ/ኢማጂነሽን ቅልውላው ኣይኮነን። ናይ ውዳበ ቅልውላው እዩ። እቲ ቅልውላው ብቐጥታ እንተዘይተገጢሙ ከኣ ነቲ ክውንነት ዝቕይሮ ዝኾነ ይኹን መደረ የለን።
ዲፕሎማስያዊ ድሕረ ባይታኡን ህዝባዊ መርገጺኡን ኣብ ግምት ብምእታው፡ ኣምባሳደር ዓንደብርሃን ኣብ ምህናጽ ተኣማንነት ዘለዎን ውሁድ ግንባር ኣበርክቶ ክገብር ኣብ ጽቡቕ ቦታ’ዩ ዝርከብ። ተመኩሮኡ ኣብ ኣገልግሎት ሓባራዊ መድረኽ ኣእትዩ፡ ትካላዊ መስርሕ ኣደልዲሉ፡ ንህዝቢ ኤርትራ ዝውክል ስሙር ፖለቲካዊ ኣካል ኣብ ምቕራጽ ክሳተፍ ይኽእል ነይሩ’ዩ። መደረኡ ግን ሓድነት ዝጽውዕ ኣይነበረን፡ ቅልውላው ምብትታን ኣፍልጦ ኣይሃበን፡ ንዝኾነ መድረኽ ክጽንበር ወይ ክድግፍ ቃል ኣይኣተወን። ዲያስፖራ ካብ ሓባራዊ መሓውራት ወጻኢ ካብ ምጽናሕ ምስ ሓባራዊ መሓውራት ክዋስኡ ፍቓደኛታት ዝኾኑ ፖለቲካዊ ተዋሳእቲ ኣዝዮም ኣብ ዘድልዮም እዋን ዕድል ዝሰእነ እቕርቦት’ዩዝ ነይሩ።
ሎሚ ቃልሲ ኤርትራ ካብ ተስፋ ዝህብ ቃላት ንላዕሊ እዩ ዘድልዮ። ውሁድ መሪሕነት፡ ተኣማንነት ዘለዎም ትካላት፡ ዝተዋደደ ስትራተጂ፡ ከምኡ’ውን ኣብቲ ከቢድ፡ መብዛሕትኡ ግዜ ዘይርአ፡ ሓቀኛ ምንቅስቓስ ንምህናጽ ዝዓለመ ስራሕ ክዋፈሩ ፍቓደኛታት ዝኾኑ ፖለቲካውያን ፍሉጣት ሰባት የድልይዎ። ከምኡ ክሳብ ዝኸውን-ከምኡ’ውን ከም በዓል ኣምባሳደር ዝኣመሰሉ ሰባት ኣብ ክንዲ ውልቃዊ ሓተታ ጥራይ ንዝተወደበ ስጉምቲ ክሳብ ዝኣትዉ-ዲያስፖራ ኣብ ቃላትን ደውታን ተሸሚሙ ክጸንሕ እዩ። ህዝቢ ኤርትራ ካብ ምትብባዕ ንላዕሊ፡ ናብ ተግባር ክቕይር ዝኽእል ፖለቲካዊ ሓይሊ ክረክብ ዝግብኦን ዝደንጎዮን ህዝቢ’ዩ እዩ።
