መራሕቲ ተቓወምቲ ውድባት ንትረኻ ቀይሕ ባሕሪ ኢትዮጵያ ከቆናጅዉ ከለዉ: ብሓዊ ምጽዋት’ዩ!

መራሕቲ ተቓወምቲ ውድባት ንትረኻ ቀይሕ ባሕሪ ኢትዮጵያ ከቆናጅዉ ከለዉ: ብሓዊ ምጽዋት’ዩ!

ኣንፈት ኣዳላዊ

9 ነሓሰ 2026 ዓ.ም

ኣብ ህይወት ነፍሲ ወከፍ ህዝቢ እቲ ዕንቅፋት ክሳብ ምድንጋር ነብሱ ዘዕነወሉ ህሞት ይመጽእ እዩ። ኤርትራ ነታ ህሞት እዚኣ ብኹሉ ክብራ እያ እተሕልፎ ዘላ። ፖለቲካዊ መሪሕነት ኢትዮጵያ ኣብ ቀይሕ ባሕሪ፣ ዓሰብ፣ ደንካልያን “ታሪኻዊ መሰላትን” ዝብሎ ዘረባታት ኣጋዲዱ፣ ገለ መግለጺታት ካብ ልምዳዊ ዲፕሎማሲ ናብ ግዝኣታዊ ጠለባት፣ ናይ ጎበጣ ስናርዮታትን ምድንጋር ለውጢ ስርዓትን ዝሰገሩ እዮም። ማዕረ ማዕሪኡ ድማ፡ ገለ ኣባላት ተቓወምቲ ኤርትራ፡ ነዚ ትረኻታት ኣብ “ስነ-መጐታዊ” ኵነታት ክትርጉምዎ፡ ከመኽንይዎን፡ ወይ ከቆናጅውዎ ኣውን ጀሚሮም ኣለዉ። እዚ ፖለቲካዊ ብስለት፡ ስትራተጂካዊ ኣተሓሳስባ ወይ ዲፕሎማሲ ኣይኮነን። እዚ ብሓዊ ምጽዋት’ዩ፡ እቲ ሓዊ ድማ ልኡላውነት ኤርትራ’ዩ።

እዚ ከምዚ ኢሉ እንከሎ፡ ኣብ ውሽጢ ተቓወምቲ ኤርትራ ዝርከቡ ኣባላትን መራሕትን ብርጌድ ንሓመዱን ሓምላይ ሰውራን ንኤርትራ ክከላኸሉ ኣይከኣሉን ጥራይ ዘይኮነስ፡ ኣብ መራኸቢ ብዙሓን ኢትዮጵያ ንዝነበረ ትረኻ ወተሃደራዊ ጎበጣ ኢትዮጵያ ብግልጺ ብምድጋፍ፡ ነቲ ብጽምዶ ዝፍለጥ ናይ ኤርትራን፡ ሱዳንን ህዝባዊ ወያነ ሓርነት ትግራይን እውን ብቓልዕ ብምጥቃዕ፡ ነፍሶም ከም ተቓወምቲ ኤርትራ ዘይኮኑስ ከም ፖለቲካዊ መሳርሒ ሰልፊ ብልጽግና ኣቐሚጦም እዮም ዝሰርሑ ዘለዉ። ኣካይዳኦም ከኣ ካብ ዘይምርዳእ ወይ ጌጋ ሚዛን ካብ ምሓዝ ጥራይ ዘይኮነስ፤ ንናጽነትንን ልኡላውነትን ኤርትራ ኮነ ኢልካ ዝተፈጸመ ክሕደት ስለዝኾነ፡ ንኤርትራ ዘለዎም ፖለቲካዊ ተኣማንነት ኣብ ዘይዕረየሉ ደረጃ በጺሑ መኣዝኖም ኣጥፊኦም እዮም።

እቲ ብኤርትራዊ ሃገራዊ ባይቶ ንደሞክራስያዊ ለውጢ ብ5 ነሓሰ 2026 ዘውጽኦ ጋዜጣዊ መግለጺ፡ ንጹር ኣብነት ናይዚ ሓደገኛ ዝንባለዚ’ዩ። እቲ መግለጺ ኣብ ክንዲ ንመሬታዊ ሓድነት ኤርትራ ዝከላኸል፡ ናብ ውሽጣዊ ጉዳያት ኢትዮጵያ ተኣልዩ፡ ነፍሱ ኣባል ቤት ምኽሪ ፈደራላዊ ኣካል ኢትዮጵያ ከም ዝኾነ ጌሩ ንመሪሕነት ዞባ ትግራይ ዘዘራረበ፡ ንብዙሕ ትርጉማት ክፉት ዘይንጹር ቋንቋ ዘቐመጠ ዛዕባ’ዩ። ውድባት ኢትዮጵያ ውግእ ከቋርጹ ከይተረፈ ምጽዋዕ፣ እዚ መርገጺ እዚ ነቲ ቤት ምኽሪ ንውልቃዊ ምልኪ ናይ ምቅዋም መሰል ዝጻረር እዩ። እቲ ዝያዳ ሓደገኛ ዝገብሮ ድማ እቲ መግለጺ ነቲ ብተደጋጋሚ ዝሃቦ ኣዋጃት ኢትዮጵያ ብዛዕባ ዓሰብ፣ ዳንኪልን ቀይሕ ባሕርን ፈጺሙ ዕሽሽ ብምባል፣ ኢትዮጵያ ኣብ ጉዳይ ሱዳን እትገብሮ ዘላ ኢድ ኣእታውነት ከይጠቐሰ ምሕላፉ እዩ። ንጹርነት ኣብ ዝጠልበሉ ህሞት፡ ኤሃባደለ ንዘይንጹርነት መሪጹ። ጽንዓት ኣብ ዝጠልበሉ ህሞት፡ ርህራሄ መሪጹ። ልኡላውነት ኤርትራ ብግዳም ተዋሳእቲ ኣብ ዝካታዓሉ ዘሎ እዋን፡ ባይቶ ኣብ ውሽጣዊ ጉዳያት ኢትዮጵያ ከም መንጎኛ መሲሉ ክዛረብ መሪጹ። እዚ መሪሕነት ኣይኮነን። እዚ ውድቀት ሃገራዊ ኣንፈት እዩ

 

 

ኢትዮጵያ ንቀይሕ ባሕሪ ብዝምልከት ትረኻ ዘቕርቡ ተቓወምቲ ሰባት ትንታነ ዘቕርቡ ኣይኮኑን። ናይ ጸላእቲ ጠለባት ከም ንቡር ተግባር ኣምሲሎም እቲ ስግኣት ኣብ ኣእምሮ ህዝቢ የለሳልስዎ ኣለዉ። ህላወኣዊ ሓደጋታት ናብ ልኡም/ልሙስ ክትዓት ይቕይርዎ ኣለዉ። ልኡላውነት ኤርትራ ናይ ዋጋ ዕዳጋ ዝእቱ ኣይኮነን። ናብ ትንግርቲ ዝኣቱ ኣርእስቲ’ውን ኣይኮነን። እዚ ጉዳይዚ ንዲፕሎማስያዊ ቁንጅና ክብል ዝለሳለስ ጉዳይ ኣይኮነን። እዚ ኤርትራ ተሰሪታትሉ ዘላ መአዓሙቕ ዝነቓንቕ እዩ። ኮይኑ ግና ገለ ተቓወምቲ ግዝኣታዊ ሓድነት ኤርትራ ኣብ ዋጋ ዕዳጋ ክኣቱ ከምዝኽእል ወይውን ካብኡ ዝኸፍአ ኣተሓሳስባ፣ ንጠለባት መንግስቲ ኢትዮጵያ ክንርድኣሎም ከም ዘሎና ዘመኻኒ ትርኽቲዩ። እዚ ካብ ሃገራዊ ተልእኾ ናይ ዝኾነ ይኹን ኤርትራዊ ፖለቲካዊ ምንቅስቓስ ዘልገሰ ኣዕናዊ ዝንባሌ እዩ።

ተቓውሞ ኤርትራ ንሓደ ዕላማ እዩ ዘሎ: ንሱ ከኣ መሰልን ክብርን ልኡላውነትን ህዝቢ ኤርትራ ንምሕላው እዩ። ናይ ካልኦት ህርፋን ንምምኽናይ ወይ ምቅንጃው ኣይኮነን። ናይ ኢትዮጵያ ግጭታት ንምሽምጋል ኣይኮነን። ንዞባዊ ሓይልታት ወኪልካ ንምዝራብ ኣይኮነን። እዚ ናይ ደገ ክሲ ንቡር ንምግባር ኣይኮነን። ኤርትራዊ መርገጺ ዘዳኽም ትረኻታት ንምቅላሕ ኣይኮነን። ነዚ ዝገብሩ ኣካላት ግን ጉዳይ ሃገር ዘኮነስ ውራይ ካልእ ካልኦት ምስሳዩ።

ኣብ መላእ ዓለም ዝርከቡ ኤርትራውያን በዚ ጉዳይዚ ቁጥዐን ጭንቀትን ይስምዖም ኣሎ። እዚ መግለጺ’ዚ ንጹር ቅዲ ምሩጽ ትኹረት፡ ባይቶ ብስም ኢትዮጵያ ይዛረብ ከምዘሎ ዝሕብር ዲፕሎማስያዊ ቋንቋ፡ ንካልእ ትርጉም ቦታ ዝኸፍት ዘይንጹር መግለጺታት፡ ኣብ መንጎ እቲ ባይቶ ባዕሉ ዝገብሮ ዘሎ ቃልስን ውድባት ኢትዮጵያ ውግእ ደው ከብሉ ዝገብሮ ጻውዒትን ዝጋጮ፡ ከምኡ’ውን ከም ፈራሕን ናይ ደላይ ዕርቅን ቃና ዘቃልሕዩ። እዚ ቃና ሃገራዊ ምንቅስቓስ ኣይኮነን። ናይ ገዛእ ርእሱ ጽላሎት ናይ ዝፈርሕ ሽማግለ ቃና እዩ።

ህዝቢ ኤርትራ ትብዓት እምበር ጥንቃቐ ኣይደልን’ዩ። ንጹርነት እምበር ዘይንጹርነት ኣይብህግንዩ። መሪሕነት እምበር ናይ ቃላት ጸወታ ኣይደልን’ዩ። ኣብዚ ናይ ኢትዮጵያ ዘረባታት እናተጋደደ ኣብ ዝኸደሉ ዘሎ እዋን፡ ተቓወምቲ ኤርትራ ብሓደ ድምጺ ክዛረቡ ኣለዎም። ልኡላውነት ኤርትራ ኣብ ዋጋ ዕዳጋ ዝኣቱ ጽላት፡ መሬት ኤርትራ ዘይግሃስ ደረት እዩ። ናጽነት ኤርትራ ከኣ ፍጹምን ዘለኣለማውን’ዩ። ካብዚ ንታሕቲ ዝህቅን እንተተልዩ ናይ ህዝቢ እምነት ዝኸሓደ ጥራይ እዩ።

ሃገራዊ ባይቶ ኤርትራ፡ ከምኡ’ውን ኩሉ ተቓዋሚ ኣካል፡ መልእኽቱ፡ ቀዳምነታቱን፡ ትብዓቱን ዳግማይ ከስተኻኽል ሎሚ ይጽዋዕ ኣሎ። ህዝቢ ይዕዘብ፡ ታሪኽ ከኣ ይምዝገብ ኣሎ። ልኡላውነት ኤርትራ ሓላፍነት እምበር ጭርሖ ጥራይ ኣይኮነን።